ಕನಸಾಗದ ' ಹೂ '
ಸೂರಿಲ್ಲದಾ ಗೂಡು-
ಕನಸಿನ ಜೋಂಪು ಹತ್ತಿದೊಡನೆ
ನಕ್ಷತ್ರಗಳು ಮೈಮೇಲೆ ಬೀಳುತ್ತವೆ !
ಬೆಳಕಿನಲ್ಲಿ ಹೇಗೆ ಕನಸು ಕಾಣುವುದು-
ಸರಿ ಸೂರಿಗೆ
ಗೋಡೆ, ಛಾವಣಿ ಹಾಕಿಸಿದೆ.
ಇನ್ನು ನೆಮ್ಮದಿಯಾಗಿ
ಕನಸು ಕಾಣೋಣವೆಂದರೆ
ಹಾಳಾದ್ದು ಗೂಡೊಳಗೆ ನಿದ್ರೆಯೇ ಬರುತ್ತಿಲ್ಲ !
ಅಲೆದೂ ಅಲೆದೂ
ಕತ್ತಲ ರಾಜ್ಯವೊಂದಕ್ಕೆ ಬಂದೆ ;
ಅಲ್ಲೊಬ್ಬ ಸಂತ
ತೆರೆದ ಕಣ್ಣುಗಳಿಂದಲೇ ಕನಸು ಕಾಣುತ್ತಿದ್ದ ;
ಪರಿಯಾಗಿ ಅವನಲ್ಲಿ ಬಿನ್ನಹಿಸಿದೆ -
ಕನಸು ನಿದ್ರಿಸಿದಾಗಲೇ ಬರಬೇಕೆಂದಿಲ್ಲ
ತೆರೆದ ಕಣ್ಣುಗಳಲ್ಲೇ ಕನಸು ಕಾಣಬಹುದು ;
ಅದೋ ಅಲ್ಲಿ ಮುಳ್ಳಿನ ರಾಶಿ ಕಾಣುತ್ತಲ್ಲ
ಅದರ ಮೇಲೆ ನಡೆದು ಸಾಗಿದರೆ
ಅಂತ್ಯಕ್ಕೆ ನಿನಗೆ ಹೂ ರಾಶಿ ಸಿಗುತ್ತದೆ ;
ಹೂ ರಾಶಿಯ ಮೇಲೆ ನಡೆದು ಸಾಗಿದರೆ
ನಂತರ ಸಿಗುವುದೇ ಕನಸು !
ಮುಳ್ಳಿಲ್ಲದೆ ಹೂವಿಲ್ಲ ; ಹೂವಿಲ್ಲದೇ ಕನಸಿಲ್ಲ !
ತಡ ಮಾಡದೇ ಓಡಿದೆ -
ಮುಳ್ಳುಗಳ ತುಳಿಯುತ್ತ
ರಕ್ತ ಒಸರುತ್ತಿದ್ದರೂ ಓಟ ನಿಲ್ಲಲಿಲ್ಲ ;
ಕಾಲ್ಗಳು ದಣಿಯಲಿಲ್ಲ
ಮುಳ್ಳುಗಳು ನಲುಗಲಿಲ್ಲ !
ಅಂತ್ಯಕ್ಕೆ ಸಿಕ್ಕೇಬಿಟ್ಟಿತು
ಹೂಗಳ ರಾಶಿ,
ನೋಟ ಹಾಯ್ದಷ್ಟೂ ಹೂ ರಾಶಿ
ಕಪ್ಪು ಕೆಂಪು ಅಲ್ಲಲ್ಲಿ ಬಿಳಿ ಹೂಗಳದ್ದೇ ಬಣ್ಣ ;
ಇಷ್ಟು ಹೊತ್ತೂ ನಾನಲ್ಲದ ನಾನು
ಈಗ ನಾನೇ ಆಗಿಬಿಟ್ಟಿದ್ದೆ !
ಕಾಲಿಟ್ಟರೆಲ್ಲಿ ಹೂಗಳು ನಲುಗುವುದೋ
ಎಂದು ಮರುಗಿದೆ !
ಹೂರಾಶಿ ತುಳಿದು ಕನಸಿಗೆ ಕಾಲಿಡಲು
ಮನಸಾಗುವುದಾದರೂ ಎಂದೋ ?
ನಮ್ಮ ಹೊಸ ಮಿತ್ರನಿಗೆ ನಮ್ಮೆಲ್ಲರ ಪರವಾಗಿ ಪುನರ್ನವ ಕುಟುಂಬಕ್ಕೆ ಸ್ವಾಗತ ಕೋರ್ತೀನಿ...
cheluvantha@yahoo.co.in
- ರೇವಪ್ಪ
3 comments:
ಅರ್ಥಪೂರ್ಣವಾದ ಕವನ.ತುಂಬಾ ಚೆನ್ನಾಗಿದೆ.....
ಹೊಸ ಸ್ನೇಹಿತನ ಹೊಸ ಕವನ ಪ್ರಾಸವಿಲ್ಲದೆಯೂ ಸುಂದರ ಕವನ ಬರೆಯೋದು ಅಂದ್ರೆ ಹೇಗೆ ಅಂತ ತೋರಿಸಿಕೊಟ್ಟಿದಾರೆ..
ಭೇಷ್ ಅನ್ನೋಣ...
ನಿಮ್ಮವ,
ರೇವಪ್ಪ
"ನಮ್ಮ ಬ್ಲಾಗ್"ನಲ್ಲಿ ಹೊಸತನ ಬೇಕು ಎಂದರೆ ಹೊಸಬರು ಬರಬೇಕು; ಹೊಸಬರು ಬರೀಬೇಕು ಎಂದು ನಾ ಯಾವಾಗಲು ನಂಬಿದ್ದೆ ಹಾಗು ವ್ಯಕ್ತಪಡಿಸಿದ್ದೆ .ನನ್ನ ನಂಬಿಕೆ ಸುಳ್ಳಾಗಲಿಲ್ಲ .ಹೊಸಬರ ಕವಿತೆಯು ಸರಳ ಸುಂದರ ಹಾಗು ಆಳವಾಗಿಯೂ ಅರ್ಥಪೂರ್ಣವಾಗಿಯೂ ಮೂಡಿಬಂದಿದೆ. ಈ ಹೊಸಬರಿಗೆ ಹೃತ್ಪೂರ್ವಕ ಸ್ವಾಗತ ಹಾಗು ಇವರು ಹೀಗೆ ಇನ್ನು ಮುಂದೆಯೂ ನಮ್ಮ ಬ್ಲಾಗಿನಲ್ಲಿ ಹೊಸತನದೊಂದಿಗೆ ಕಾಣಿಸಿಕೊಳ್ಳಲಿ . "ನಮ್ಮ ಬ್ಲಾಗ್" ನ ಮರುಚಾಲನೆಯು ಹೊಸತನದಿಂದ ಕೂಡಿದ್ದು ನಿಜಯಗಿಯು ಅರ್ಥಪೂರ್ಣವಾಗಿದೆ
---ನಿಮ್ ಹುಡ್ಗ
ಸಕ್ಕತ್ ಸಚ್ಚಿ
Post a Comment